പുത്തൻകുരിശ് ● യാക്കോബായ സുറിയാനി സഭയുടെ ഭാഗ്യസ്മരണാര്‍ഹനായ ശ്രേഷ്ഠ മോര്‍ ബസ്സേലിയോസ് തോമസ് പ്രഥമന്‍ കാതോലിക്ക ബാവായുടെ 12-ാം ഓര്‍മ്മദിനമായ ഇന്ന് തിങ്കളാഴ്ച പുത്തന്‍കുരിശ് സെന്റ് അത്തനേഷ്യസ് കത്തീഡ്രലില്‍ രാവിലെ 6.30 ന് ആരംഭിച്ച വിശുദ്ധ കുര്‍ബ്ബാനയ്ക്ക് അഭിവന്ദ്യ ഡോ. എബ്രഹാം മോര്‍ സേവേറിയോസ് മെത്രാപ്പോലീത്ത പ്രധാന കാര്‍മികത്വവും വന്ദ്യ വര്‍ഗ്ഗീസ് അരീക്കല്‍ കോറെപ്പിസ്‌ക്കോപ്പ, വന്ദ്യ ഇ.സി. വര്‍ഗ്ഗീസ് കോറെപ്പിസ്‌ക്കോപ്പ എന്നിവര്‍ സഹകാര്‍മികത്വവും വഹിച്ചു. അഭി. ഡോ. മാത്യൂസ് മോര്‍ അന്തിമോസ്, അഭി. മര്‍ക്കോസ് മോര്‍ ക്രിസ്റ്റഫോറോസ് എന്നീ മെത്രാപ്പോലീത്താമാരും, സഭാ ഭാരവാഹികളും, നിരവധി വൈദീകരും, അനേകം വിശ്വാസികളും വി. കുര്‍ബ്ബാനയിലും, കബറിങ്കല്‍ നടത്തപ്പെട്ട ധൂപപ്രാര്‍ത്ഥനയിലും പങ്കെടുത്തു.

തുടര്‍ന്ന് അങ്കമാലി ഭദ്രാസനം-അങ്കമാലി മേഖലയുടെ നേതൃത്വത്തില്‍ പ്രാര്‍ത്ഥനയും, അനുസ്മരണ സമ്മേളനവും നടത്തപ്പെട്ടു. ഉച്ചയക്ക് 12.00 മണിയ്ക്ക് നടന്ന ഉച്ചനമസ്‌ക്കാരത്തില്‍ പട്ടിമറ്റം മോര്‍ കൂറിലോസ് ഹയര്‍ സെക്കന്‍ഡറി സ്‌കൂളിലെ ആക്ടിംഗ് മാനേജര്‍ ഫാ. ഏലിയാസ് ഈരാളില്‍ കശീശ്ശായും, അദ്ധ്യാപകരും, 250-ഓളം വിദ്യാര്‍ത്ഥികളും പങ്കെടുത്തു.

വൈകീട്ട് 6.00 മണിയ്ക്ക് നടന്ന സന്ധ്യാപ്രാര്‍ത്ഥനയ്ക്ക് മലങ്കര മെത്രാപ്പോലീത്തായും പരി. എപ്പിസ്‌ക്കോപ്പല്‍ സുന്നഹദോസ് പ്രസിഡന്റുമായ അഭി. ജോസഫ് മോര്‍ ഗ്രീഗോറിയോസ് മെത്രാപ്പോലീത്ത നേതൃത്വം നല്‍കി. അഭി. മാത്യൂസ് മോർ ഈവാനിയോസ്, അഭി. മാത്യൂസ് മോര്‍ അഫ്രേം, അഭി. ഡോ. മാത്യൂസ് മോര്‍ അന്തിമോസ്, അഭി. മര്‍ക്കോസ് മോര്‍ ക്രിസ്റ്റഫോറോസ് എന്നീ മെത്രാപ്പോലീത്താമാരും, വന്ദ്യ കോറെപ്പിസ്‌ക്കോപ്പാമാരും, ബഹു. വൈദീകരും, നിരവധി വിശ്വാസികളും സംബന്ധിച്ചു.