ആലുവ ● തൃക്കുന്നത്ത് സെന്റ് മേരീസ് യാക്കോബായ സുറിയാനി പള്ളിയിൽ കബറടങ്ങിയിരിക്കുന്ന പരിശുദ്ധ പൗലോസ് മോർ അത്താനാസിയോസ് വലിയ തിരുമേനിയുടെ 72-ാമത് ശ്രാദ്ധപ്പെരുന്നാളിനും, പുണ്യപിതാക്കന്മാരുടെ സംയുക്ത ഓർമ്മപ്പെരുന്നാളിനും അങ്കമാലി മേഖല സഹായ മെത്രാപ്പോലീത്ത അഭിവന്ദ്യ ഡോ. മോർ അന്തിമോസ് മാത്യൂസ് മെത്രാപ്പോലീത്ത കൊടിയുയർത്തി.

സത്യവിശ്വാസ സംരക്ഷകനായ പരിശുദ്ധ പൗലോസ് മോർ അത്താനാസിയോസ് വലിയ തിരുമേനിയുടെ 72-ാം ഓർമ്മപ്പെരുന്നാളും പുണ്യശ്ലോകരായ ശ്രേഷ്‌ഠ മോർ ബസ്സേലിയോസ് തോമസ് പ്രഥമൻ കാതോലിക്ക ബാവ, അമ്പാട്ട് ഗീവറുഗീസ് മോർ കൂറിലോസ്, കടവിൽ പൗലോസ് മോർ അത്താനാസിയോസ്, വയലിപ്പറമ്പിൽ ഗീവർഗീസ് മോർ ഗ്രിഗോറിയോസ് എന്നീ പിതാക്കന്മാരുടെ ഓർമ്മപ്പെരുന്നാളും സംയുക്തമായാണ് ആചരിക്കുന്നത്.

വെള്ളിയാഴ്ച വൈകിട്ട് 6:45 ന് നടക്കുന്ന സന്ധ്യാപ്രാർഥനയ്ക്ക് അഭിവന്ദ്യ മോർ അഫ്രേം മാത്യൂസ് മെത്രാപ്പോലീത്ത നേതൃത്വം നൽകും. തുടർന്ന് അഭിവന്ദ്യ മെത്രാപ്പോലിത്ത അനുഗ്രഹ പ്രഭാഷണം നടത്തും. രാത്രി 8 മണിക്ക് പ്രദക്ഷിണവും, നേർച്ചസദ്യയും ഉണ്ടാവും. ജനുവരി 26 ഞായറാഴ്ച രാവിലെ 8:15 ന് നടക്കുന്ന വിശുദ്ധ കുർബ്ബാനയ്ക്ക് മലങ്കര മെത്രാപ്പോലീത്തയും, നിയുക്ത കാതോലിക്കയുമായ അഭിവന്ദ്യ മോർ ഗ്രിഗോറിയോസ് ജോസഫ് മെത്രാപ്പോലീത്ത മുഖ്യ കാർമികത്വം വഹിക്കും. തുടർന്ന് ധൂപപ്രാർഥന, പ്രദക്ഷിണം. ആശീർവാദം, നേർച്ചസദ്യ, കൊടിയിറക്ക് എന്നിവയും ഉണ്ടാകും.

ഇടവക വികാരി ഫാ. ഗീവർഗീസ് അരീയ്ക്കൽ, ട്രസ്റ്റി എം.എം. പൗലോസ്, സെക്രട്ടറി എ.പി. രാജു, കൺവീനർ കെ. പത്രോസ്, ഷാന്റി വിത്സൻ എന്നിവർ പെരുന്നാൾ ചടങ്ങുകൾക്ക് നേതൃത്വം വഹിക്കും.

പെരുന്നാൾ ശുശ്രൂഷകൾ യാക്കോബായ സുറിയാനി സഭയുടെ ഔദ്യോഗിക മാധ്യമ വിഭാഗമായ ജെ.എസ്.സി ന്യൂസിലൂടെ തൽസമയ സംപ്രേഷണം ചെയ്യും.