ഇസ്‌നിക് (തുർക്കി) ● ക്രൈസ്തവ വിശ്വാസചരിത്രത്തിലെ സുപ്രധാന നാഴികക്കല്ലായ നിഖ്യാ സുന്നഹദോസിൻ്റെ 1700-ാമത് ജൂബിലി ആഘോഷങ്ങൾക്ക് സാക്ഷ്യം വഹിച്ചുകൊണ്ട്, ലോകമെമ്പാടുമുള്ള ക്രൈസ്തവ സഭകളുടെ പരമാദ്ധ്യക്ഷൻമാർ പ്രാചീന നിഖ്യായുടെ (ഇസ്‌നിക്) മണ്ണിൽ വീണ്ടും ഒരുമിച്ചുചേർന്നു. 2025 നവംബർ 28-ന് നടന്ന ഈ ചരിത്രപരമായ എക്യുമെനിക്കൽ പ്രാർത്ഥനാ ശുശ്രൂഷയ്ക്ക് ആകമാന സുറിയാനി ഓർത്തഡോക്സ് സഭയുടെ പരമാദ്ധ്യക്ഷൻ പരിശുദ്ധ മോറാൻ മോർ ഇഗ്നാത്തിയോസ് അഫ്രേം ദ്വിതീയൻ പാത്രിയർക്കീസ് ബാവ, ആഗോള കത്തോലിക്ക സഭയുടെ തലവൻ ലിയോ പതിനാലാമൻ മാർപ്പാപ്പ, എക്യുമെനിക്കൽ പാത്രിയാർക്കീസ് ബർത്തലോമിയോ എന്നിവർ സംയുക്തമായി അധ്യക്ഷത വഹിച്ചു. മറ്റ് സഭകളുടെ സുപ്രധാന ആത്മീയ നേതാക്കന്മാരും ചടങ്ങിൽ പങ്കെടുത്തു.
നാലുഭാഗങ്ങളിലുമുള്ള സഭാപിതാക്കന്മാർ ഒരുമിച്ച് പ്രാർത്ഥനയർപ്പിച്ച ഈ ദിവ്യനിമിഷം, ലോകസഭാ ഐക്യം, പ്രാചീന വിശ്വാസപാരമ്പര്യത്തിന്റെ മഹത്വം, സമാധാനത്തിന്റെ വിജ്ഞാനം എന്നിവ സമന്വയിച്ച ഒരു ആത്മീയ പുനർസംഗമമായി മാറി. 1700 വർഷങ്ങൾക്കുമുമ്പ് നടന്ന സുന്നഹദോസിൻ്റെ ചരിത്രപരമായ പ്രാധാന്യം ഓർമ്മപ്പെടുത്തുന്നതായിരുന്നു ഈ ഭക്തിനിർഭരമായ ശുശ്രൂഷ.
