അബുദാബി ● യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവ യു.എ.ഇ സന്ദർശനത്തിനായി എത്തിച്ചേർന്നു. അബുദാബി അന്താരാഷ്ട്ര വിമാനത്താവളത്തിൽ എത്തിയ ശ്രേഷ്ഠ ബാവായ്ക്ക് പാത്രിയാർക്കൽ വികാരി അഭിവന്ദ്യ മോർ യൗസേബിയോസ് കുര്യാക്കോസ് മെത്രാപ്പോലീത്തയുടെ നേതൃത്വത്തിൽ സോണലിലെ വൈദികരും ഭാരവാഹികളും ചേർന്ന് സ്നേഹനിർഭരമായ സ്വീകരണം നൽകി.
സന്ദർശനത്തിന്റെ ഭാഗമായി ദുബായ് മോർ ഇഗ്നാത്തിയാസ് കത്തീഡ്രൽ, ഫുജൈറ സെന്റ് പീറ്റേഴ്സ്, റാസ് അൽ ഖൈമ സെന്റ് ഗ്രീഗോറിയോസ്, അബുദാബി സെന്റ് സ്റ്റീഫൻസ്, ഷാർജ സെന്റ് മേരീസ് സൂനോറോ പാത്രിയാർക്കൽ കത്തീഡ്രൽ, അൽ ഐൻ സെന്റ് ജോർജ്ജ് സിംഹാസന കത്തീഡ്രൽ ഉൾപ്പെടെയുള്ള ദൈവാലയങ്ങളിൽ ബാവ സന്ദർശനം നടത്തുകയും വിവിധ പരിപാടികളിൽ പങ്കെടുക്കുകയും ചെയ്യും.
യു.എ.ഇ മേഖലയിലെ മഹാസംഗമവും ശ്രേഷ്ഠ കാതോലിക്ക ബാവായ്ക്ക് പൊതുസ്വീകരണവും നവംബർ 30 ഞായറാഴ്ച രാവിലെ 10 മണിക്ക് ദുബായ് അൽ നാസർ ലഷർ ലാൻഡിൽ വെച്ച് നടക്കും.
