മഴുവന്നൂർ ● അങ്കമാലി ഭദ്രാസനത്തിലെ പെരുമ്പാവൂർ മേഖലയിലെ മഴുവന്നൂർ സെന്റ് തോമസ് യാക്കോബായ സുറിയാനി കത്തീഡ്രൽ വലിയ പള്ളിയിൽ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവായ്ക്ക് പ്രൗഢോജ്ജ്വല സ്വീകരണം നൽകും. ഇതോടനുബന്ധിച്ച് ഇടവകയുടെ കുടുംബസംഗമവും സംഘടിപ്പിച്ചിട്ടുണ്ട്. ഇന്ന് (നവംബർ 7, ശനിയാഴ്ച) നടക്കുന്ന പരിപാടികളുടെ ഒരുക്കങ്ങൾ പൂർത്തിയായി.
വൈകിട്ട് 4.30-ന് പുത്തൻകുരിശ് പാത്രിയർക്കാ സെന്ററിൽനിന്ന് നൂറുകണക്കിന് വാഹനങ്ങളുടെ അകമ്പടിയോടെ ശ്രേഷ്ഠ ബാവായെ സ്വീകരിച്ച് മഴുവന്നൂരിലേക്ക് ആനയിക്കും. തുടർന്ന് വൈകിട്ട് 5.30-ന് മഴുവന്നൂർ സെന്റ് തോമസ് യാക്കോബായ സുറിയാനി കത്തീഡ്രൽ വലിയ പള്ളിയുടെ അങ്കണത്തിൽ ചേരുന്ന മഹാസമ്മേളനത്തിൽ ശ്രേഷ്ഠ ബാവായ്ക്ക് ഔദ്യോഗിക സ്വീകരണം നൽകും.
പെരുമ്പാവൂർ മേഖല മെത്രാപ്പോലീത്ത അഭിവന്ദ്യ മോർ അഫ്രേം മാത്യൂസ് മെത്രാപ്പോലീത്തയുടെ അധ്യക്ഷതയിൽ ചേരുന്ന സമ്മേളനം കേരള ഭക്ഷ്യ-സിവിൽ സപ്ലൈസ് വകുപ്പ് മന്ത്രി അനൂപ് ജേക്കബ് ഉദ്ഘാടനം ചെയ്യും. പാർലമെന്റ് അംഗം ബെന്നി ബഹനാൻ, എം.എൽ.എ. വി.വി. സജീന്ദ്രൻ എന്നിവർ വിശിഷ്ടാതിഥികളായി പങ്കെടുക്കും.
അഭിവന്ദ്യ ഡോ. മോർ സേവേറിയോസ് എബ്രഹാം വലിയ മെത്രാപ്പോലീത്ത, അഭിവന്ദ്യ ഡോ. മോർ ഈവാനിയോസ് മാത്യൂസ് മെത്രാപ്പോലീത്ത, അഭിവന്ദ്യ ഡോ. മോർ അന്തിമോസ് മാത്യൂസ് മെത്രാപ്പോലീത്ത, അഭിവന്ദ്യ മോർ തീമോത്തിയോസ് മാത്യൂസ് മെത്രാപ്പോലീത്ത തുടങ്ങിയ പിതാക്കന്മാരും സഭയിലെ വൈദികരും സമ്മേളനത്തിൽ സംബന്ധിക്കും.
സഭാ വൈദിക ട്രസ്റ്റി ഫാ. റോയി ജോർജ് കട്ടച്ചിറ, സഭാ ട്രസ്റ്റി തമ്പു ജോർജ് തുകലൻ, സഭാ സെക്രട്ടറി ജേക്കബ് സി. മാത്യു എന്നിവർക്കൊപ്പം വിവിധ രാഷ്ട്രീയ, സാമൂഹിക, സാംസ്കാരിക രംഗങ്ങളിലെ പ്രമുഖ വ്യക്തിത്വങ്ങളും ചടങ്ങിൽ പങ്കെടുക്കും.
സമ്മേളനത്തോടനുബന്ധിച്ച് ഇടവകയിലെ സീനിയർ വൈദികരെയും ശുശ്രൂഷകനെയും ആദരിക്കും. കുടുംബ യൂണിറ്റുകൾക്കുള്ള എവർ റോളിങ് ട്രോഫി വിതരണവും ജീവകാരുണ്യ പ്രവർത്തനങ്ങൾക്കുള്ള ധനസഹായ വിതരണവും ചടങ്ങിന്റെ ഭാഗമായി നടക്കും.
സ്വീകരണവും പൊതുസമ്മേളനവും മലങ്കര യാക്കോബായ സുറിയാനി ഓർത്തഡോക്സ് സഭയുടെ ഔദ്യോഗിക മാധ്യമ വിഭാഗമായ ജെ.എസ്.സി ന്യൂസിലൂടെ തൽസമയം സംപ്രേഷണം ചെയ്യും.
About the Author
