ദുബായ് ● മോർ ഇഗ്നാത്തിയോസ് യാക്കോബായ സുറിയാനി ഓർത്തഡോക്സ് കത്തീഡ്രലിന്റെ സുവർണ്ണ ജൂബിലി ആഘോഷങ്ങളുടെ ഭാഗമായി അഖില മലങ്കര ആരാധനാഗീത മത്സരം ‘Qolo Qadeesho 2026’ സംഘടിപ്പിക്കുന്നു. ഓൺലൈനായി നടക്കുന്ന മത്സരത്തിലേക്ക് മലങ്കര യാക്കോബായ സുറിയാനി സഭയിലെ ഗായകസംഘങ്ങളെ സ്വാഗതം ചെയ്തു.
സഭയുടെ ആരാധനാ സംഗീതത്തിന്റെ ആത്മീയതയും പാരമ്പര്യവും പുതുതലമുറയിലേക്ക് പകർന്നു നൽകുക എന്ന ലക്ഷ്യത്തോടെയാണ് മത്സരം സംഘടിപ്പിക്കുന്നത്. ഇന്ത്യയിലെയും വിദേശത്തെയും വിവിധ ഇടവകകളിൽ നിന്നുള്ള ഗായകസംഘങ്ങൾക്ക് മത്സരത്തിൽ പങ്കെടുക്കാം.
മത്സരത്തിനായി തയ്യാറാക്കുന്ന വീഡിയോ സെപ്റ്റംബർ 8-ന് മുമ്പായി സമർപ്പിക്കണം. ഒരേ ഗായകസംഘത്തിൽ കുറഞ്ഞത് അഞ്ച് പേരും പരമാവധി 15 പേരും ഉണ്ടായിരിക്കണം. സഭയുടെ ആരാധനാക്രമവുമായി ബന്ധപ്പെട്ട ഗാനങ്ങളാണ് മത്സരത്തിനായി അവതരിപ്പിക്കേണ്ടത്. ഒരു ഗായകസംഘത്തിന് ഒരു വീഡിയോ മാത്രമാണ് സമർപ്പിക്കാനാകുക.
വീഡിയോ ലാൻഡ്സ്കേപ്പ് ഫോർമാറ്റിൽ 16:9 അനുപാതത്തിലും 1920 × 1080 പിക്സൽ (Full HD) നിലവാരത്തിലുമാകണം. വീഡിയോ ഒറ്റ ഷോട്ടിൽ (Single Take) ചിത്രീകരിച്ചതായിരിക്കണം. മത്സരത്തിൽ പങ്കെടുക്കുന്നവർക്ക് സ്വന്തം ഇടവക വികാരിയുടെ ശുപാർശപത്രവും സമർപ്പിക്കണം.
മത്സരത്തിന്റെ വിജയികളെ സെപ്റ്റംബർ 27-ന് നടക്കുന്ന സുവർണ്ണ ജൂബിലി ആഘോഷങ്ങളുടെ ഭാഗമായി പ്രഖ്യാപിക്കും. ഒന്നാം സ്ഥാനത്തിന് ₹15,000, രണ്ടാം സ്ഥാനത്തിന് ₹10,000, മൂന്നാം സ്ഥാനത്തിന് ₹5,000 എന്നിങ്ങനെയാണ് സമ്മാനത്തുക.
മത്സരത്തിന്റെ ഭാഗമായി ലഭിക്കുന്ന വീഡിയോകൾ കത്തീഡ്രലിന്റെ സാമൂഹിക മാധ്യമങ്ങളിലൂടെയും പ്രചാരണ ആവശ്യങ്ങൾക്കുമായി ഉപയോഗിക്കാനുള്ള അവകാശം സംഘാടകർക്ക് ഉണ്ടായിരിക്കും. പങ്കെടുക്കുന്ന വീഡിയോകൾക്ക് ലഭിക്കുന്ന ലൈക്ക്, ഷെയർ, എൻഗേജ്മെന്റ് എന്നിവയും മത്സരത്തിന്റെ ഭാഗമായുള്ള സാമൂഹിക മാധ്യമ പ്രചാരണത്തിൽ പരിഗണിക്കും.
കൂടുതൽ വിവരങ്ങൾക്ക് Biju N. Raju: +971 55 179 7339, Amal Simon: +971 56 153 8306 എന്നീ നമ്പറുകളിൽ ബന്ധപ്പെടാം.
