പുത്തൻകുരിശ് ● യാക്കോബായ സുറിയാനി സഭയുടെ ഭാഗ്യസ്മരണാര്‍ഹനായ ശ്രേഷ്ഠ മോര്‍ ബസ്സേലിയോസ് തോമസ് പ്രഥമന്‍ കാതോലിക്ക ബാവായുടെ 14-ാം ഓര്‍മ്മദിനമായ ഇന്ന് ബുധനാഴ്‌ച പുത്തന്‍കുരിശ് സെന്റ് അത്തനേഷ്യസ് കത്തീഡ്രലില്‍ വിശുദ്ധ മൂന്നിന്മേൽ കുര്‍ബ്ബാനയ്ക്ക് മലബാർ ഭദ്രാസനാധിപൻ അഭിവന്ദ്യ മോര്‍ സ്തേഫാനോസ്‌ ഗീവർഗീസ്‌ മെത്രാപ്പോലീത്ത പ്രധാന കാര്‍മികത്വം വഹിച്ചു. അഭിവന്ദ്യ ഡോ. മോര്‍ അന്തിമോസ് മാത്യൂസ് മെത്രാപ്പോലീത്ത സന്നിഹിതനായിരുന്നു. സഭാ ഭാരവാഹികളും, നിരവധി വൈദീകരും, അനേകം വിശ്വാസികളും വി. കുര്‍ബ്ബാനയിലും, കബറിങ്കല്‍ നടത്തപ്പെട്ട ധൂപപ്രാര്‍ത്ഥനയിലും പങ്കെടുത്തു.

തുടര്‍ന്ന് ധ്യാനവും പ്രാര്‍ത്ഥനയും, അനുസ്മരണ സന്ദേശവും നടന്നു. ഉച്ചയക്ക് 12.00 മണിയ്ക്ക് മദ്ധ്യാഹ്ന നമസ്ക്കാരം നടത്തപ്പെട്ടു.

വൈകീട്ട് നടന്ന സന്ധ്യാപ്രാര്‍ത്ഥനയ്ക്ക് അഭിവന്ദ്യ മെത്രാപ്പോലീത്തമാരായ മോർ ഈവാനിയോസ് മാത്യൂസ്, മോർ അന്തോണിയോസ് യാക്കോബ്, മോർ യൂലിയോസ് ഏലിയാസ്‌, ഡോ. മോർ അന്തിമോസ് മാത്യൂസ് എന്നിവരും വന്ദ്യ കോറെപ്പിസ്‌ക്കോപ്പാമാരും, വൈദീകരും, നിരവധി വിശ്വാസികളും സംബന്ധിച്ചു.