പിറമാടം ● മലങ്കര യാക്കോബായ സുറിയാനി ഓർത്തഡോക്സ് സഭയുടെ കണ്ടനാട് ഭദ്രാസനത്തിലെ പിറമാടം സെന്റ് ജോൺസ് ബെത്ലഹേം യാക്കോബായ സുറിയാനി പള്ളിയിൽ ഉണ്ടായ സംഘർഷത്തെ തുടർന്ന് സഭാ തർക്കത്തിന് ശാശ്വത പരിഹാരം ഉണ്ടാകണമെന്ന ആവശ്യം ശക്തമാകുന്നു.
സഭാ തർക്കവുമായി ബന്ധപ്പെട്ട വിവിധ കേസുകൾ കേരള ഹൈക്കോടതിയിലും സുപ്രീം കോടതിയിലും പരിഗണനയിലിരിക്കെ, സംസ്ഥാന സർക്കാരിന്റെ നേതൃത്വത്തിൽ മധ്യസ്ഥ ചർച്ചകൾ പുരോഗമിക്കുന്ന സാഹചര്യത്തിലാണ് പള്ളിയുമായി ബന്ധപ്പെട്ട് വീണ്ടും സംഘർഷാവസ്ഥ ഉണ്ടായത്.
യാക്കോബായ സുറിയാനി സഭയുടെ നിയന്ത്രണത്തിലുള്ള ദൈവാലയത്തിൽ വിശുദ്ധ ആരാധന നടക്കുന്നതിനിടെ ഓർത്തഡോക്സ് വിഭാഗത്തിൽപ്പെട്ട വൈദികൻ പള്ളിക്കുള്ളിൽ പ്രവേശിച്ച് ആരാധന തടസ്സപ്പെടുത്താൻ ശ്രമിച്ചതാണ് സംഘർഷങ്ങൾക്ക് തുടക്കമായത്. സംഭവത്തെ തുടർന്ന് പള്ളിയിലും പരിസരത്തും സംഘർഷാവസ്ഥ രൂപപ്പെട്ടു.
തുടർന്ന് ഓർത്തഡോക്സ് വിഭാഗത്തിൽപ്പെട്ടവർ പള്ളിയുടെ ഗേറ്റിന് പുറത്ത് നിലയുറപ്പിച്ചെങ്കിലും പിന്നീട് പിൻവാങ്ങിയതായും, നിലവിൽ ദൈവാലയത്തിൽ കാര്യങ്ങൾ സമാധാനപരമായി അവസാനിച്ചതായും യാക്കോബായ സഭാ വിശ്വാസികൾ അറിയിച്ചു.
സംഭവസമയത്ത് വിശ്വാസികൾക്ക് പിന്തുണയുമായി മലങ്കര യാക്കോബായ സുറിയാനി സഭ അൽമായ ട്രസ്റ്റി കമാൻഡർ തമ്പു ജോർജ് തുകലൻ, വർക്കിംഗ് കമ്മിറ്റി അംഗം ജെയ്സ് ജോൺ, കണ്ടനാട് യൂത്ത് അസ്സോസിയേഷൻ ഭാരവാഹികൾ തുടങ്ങിയവർ പള്ളിയിലെത്തി. സംഘർഷസാഹചര്യത്തിൽ വിശ്വാസികൾക്കൊപ്പം സഭാ-ഭക്തസംഘടനാ ഭാരവാഹികൾ നിലകൊണ്ടത് ആത്മവിശ്വാസം പകർന്നതായി ഇടവക നേതൃത്വം പറഞ്ഞു.
നേരത്തെ കുറിഞ്ഞി പള്ളിയിലുണ്ടായ സംഭവങ്ങളും സഭാ തർക്കവുമായി ബന്ധപ്പെട്ട് വിവിധ ഇടങ്ങളിൽ ആവർത്തിച്ചുണ്ടാകുന്ന സംഘർഷങ്ങളും വിശ്വാസികൾക്കിടയിൽ ആശങ്ക വർധിപ്പിക്കുന്നതായി അവർ ചൂണ്ടിക്കാട്ടി. നിയമനടപടികൾ കോടതികളിൽ തുടരുന്നതിനൊപ്പം, പരസ്പര ബഹുമാനവും സമാധാനവും മുൻനിർത്തിയുള്ള ചർച്ചകളിലൂടെ സഭാ തർക്കത്തിന് ശാശ്വതമായ പരിഹാരം കണ്ടെത്തണമെന്നാണ് വിശ്വാസികളുടെ ആവശ്യം.
ആരാധനാലയങ്ങൾ സംഘർഷത്തിന്റെയും ഏറ്റുമുട്ടലിന്റെയും വേദികളാകാതെ പ്രാർത്ഥനയുടെയും സമാധാനത്തിന്റെയും കേന്ദ്രങ്ങളായി നിലനിൽക്കണമെന്നും വിശ്വാസികൾ ആവശ്യപ്പെട്ടു.
സംസ്ഥാന സർക്കാരിന്റെ നേതൃത്വത്തിൽ നടക്കുന്ന മധ്യസ്ഥ ചർച്ചകൾ കൂടുതൽ ഫലപ്രദമാക്കി, ഇരുവിഭാഗങ്ങളുടെയും അവകാശങ്ങളും ആരാധനാ സ്വാതന്ത്ര്യവും പരിഗണിച്ച് ദീർഘകാലമായി നിലനിൽക്കുന്ന സഭാ തർക്കത്തിന് സമാധാനപരമായ പരിഹാരം കണ്ടെത്തണമെന്ന ആവശ്യം ശക്തമാകുകയാണ്. സഭാ തർക്കത്തിന് എത്രയും വേഗം പരിഹാരം കണ്ടെത്തി വിശ്വാസികൾക്ക് സമാധാനത്തോടെ ആരാധന നടത്താൻ കഴിയുന്ന സാഹചര്യം സൃഷ്ടിക്കണമെന്നതാണ് ഇപ്പോൾ ഉയരുന്ന പ്രധാന ആവശ്യം.
