മേപ്രാൽ (പത്തനംതിട്ട) ● പ്രളയബാധിതർക്ക് ആശ്വാസമേകി മലങ്കര യാക്കോബായ സുറിയാനി ഓർത്തഡോക്സ് സഭയുടെ നിരണം ഭദ്രാസനത്തിന്റെയും മേപ്രാൽ സെന്റ് ജോൺസ് യാക്കോബായ സുറിയാനി പള്ളിയുടെയും നേതൃത്വത്തിൽ ഭക്ഷ്യധാന്യ കിറ്റ് വിതരണം ചെയ്തു. പ്രളയത്തിൽ ദുരിതമനുഭവിക്കുന്ന മേപ്രാൽ പ്രദേശത്തെ കുടുംബങ്ങൾക്കാണ് ഭക്ഷ്യധാന്യ കിറ്റുകൾ വിതരണം ചെയ്തത്. പ്രതിസന്ധി ഘട്ടത്തിൽ ദുരിതബാധിതർക്ക് കരുതലും പിന്തുണയും നൽകുകയെന്ന ലക്ഷ്യത്തോടെയാണ് സന്നദ്ധ പ്രവർത്തനം സംഘടിപ്പിച്ചത്.
നിരണം ഭദ്രാസനാധിപൻ അഭിവന്ദ്യ ഡോ. മോർ കൂറിലോസ് ഗീവർഗീസ് മെത്രാപ്പോലീത്ത, വൈദികർ, ഭദ്രാസന-ഇടവക ഭാരവാഹികൾ, വിവിധ ഭക്തസംഘടനകളുടെ ഭാരവാഹികൾ തുടങ്ങിയവർ വിതരണത്തിൽ പങ്കെടുത്തു.
പ്രളയബാധിതർക്ക് ആവശ്യമായ സഹായങ്ങൾ തുടർന്നും ലഭ്യമാക്കുന്നതിനും ദുരിതകാലത്ത് സമൂഹത്തോടൊപ്പം നിലകൊള്ളുന്നതിനുമുള്ള സഭയുടെ സാമൂഹിക പ്രതിബദ്ധതയുടെ ഭാഗമായാണ് പ്രവർത്തനം സംഘടിപ്പിച്ചത്.
