ഡബ്ലിൻ ● യാക്കോബായ സുറിയാനി ഓർത്തഡോക്സ് സഭയുടെ ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവായെ വരവേല്‍ക്കാന്‍ അയര്‍ലണ്ടിലെ വിശ്വാസി സമൂഹം ഒരുങ്ങി. കാതോലിക്ക സ്ഥാന ലബ്ധിക്കു ശേഷം ആദ്യത്തെ അയര്‍ലണ്ട് സന്ദര്‍ശനം ഗംഭീര ആഷോഘമാക്കാനുള്ള എല്ലാ ഒരുക്കങ്ങളും പൂര്‍ത്തിയായതായി ഭാരവാഹികൾ അറിയിച്ചു.
ഇന്ന് സെപ്റ്റംബർ 19 വെള്ളി മുതല്‍ 24 വരെയാണ് ശ്രേഷ്ഠ ബാവായുടെ അനുഗ്രഹീത സന്ദര്‍ശനം. ഇന്ന് അയര്‍ലണ്ട് ഷാനോണ്‍ എയര്‍പോര്‍ട്ടില്‍ എത്തുന്ന ശ്രേഷ്ഠ ബാവായെ അയര്‍ലണ്ട് പാത്രിയാർക്കൽ വികാരി അഭിവന്ദ്യ മോര്‍ അലക്‌സന്ത്രയോസ് തോമസ് മെത്രാപ്പോലീത്ത, ഭദ്രാസന വൈസ് പ്രസിഡൻ്റ് ഫാ. ജിനോ ജോസഫ്, സെക്രട്ടറി ഫാ. ഡോ. ജോബി സ്‌കറിയ, ട്രഷറര്‍ സുനില്‍ എബ്രഹാം എന്നിവരുടെ നേതൃത്വത്തില്‍ ഭദ്രാസന ഭാരവാഹികളും കൗണ്‍സില്‍ അംഗങ്ങളും ഭക്തസംഘടനാ ഭാരവാഹികളും ചേര്‍ന്ന് സ്വീകരിക്കും. വൈകിട്ട് ഗാൽവേയിലേക്ക് പോകുന്ന ബാവ, ഗാൽവേ സെന്റ് ജോര്‍ജ് യാക്കോബായ സുറിയാനി ഓർത്തഡോക്സ് പള്ളിയിൽ സന്ധ്യാപ്രാര്‍ത്ഥനക്ക് നേതൃത്വം നൽകും.
20-ന് ശനിയാഴ്ച വൈകിട്ട് 4 ന് അയര്‍ലണ്ട് ഭദ്രാസനത്തിന്റെ ആഭിമുഖ്യത്തില്‍ ബാവായ്ക്ക്, രാജ്യത്തെ ഇരുപത് യാക്കോബായ സുറിയാനി ഇടവകകളില്‍ നിന്നുള്ള വിശ്വാസി സമൂഹം നോക്ക് ഷ്‌റൈനിൻ ഹൃദ്യമായ സ്വീകരണം നല്‍കും. തുടര്‍ന്ന് യൂറോപ്പിലെ പ്രമുഖ മരിയന്‍ തീര്‍ത്ഥാടന കേന്ദ്രമായ നോക്ക് പള്ളിയില്‍ ബാവായുടെ മുഖ്യ കാര്‍മികത്വത്തിലും അഭിവന്ദ്യ മോര്‍ അലക്‌സന്ത്രയോസ് തോമസ് മെത്രാപ്പോലീത്തയുടെ സഹകാര്‍മികത്വത്തിലും വിശുദ്ധ കുര്‍ബ്ബാന നടക്കും.
21-ന് ഞായറാഴ്ച ഡബ്ലിന്‍ സെന്റ് ഗ്രീഗോറിയോസ് യാക്കോബായ സുറിയാനി ഓർത്തഡോക്സ് പള്ളിയുടെ 20-ാമത് വാര്‍ഷിക ആഘോഷ പരിപാടികളില്‍ ബാവ പങ്കെടുക്കും. അയര്‍ലണ്ടിലെ വിവിധ സഭാ മേലധ്യക്ഷരും രാഷ്ട്രീയ സാംസ്‌കാരിക നേതാക്കളും പരിപാടിയില്‍ സംബന്ധിക്കും. പിന്നീട് സെന്റ് ഗ്രിഗോറിയോസ് പള്ളി പുതുതായി വാങ്ങിയ സ്ഥലത്തിന്റെ കൂദാശയും ബാവ നിര്‍വഹിക്കും. തുടർന്ന് ബാവ ബെൽഫാസ്റ്റിലേക്ക് പോകും.
22-ന് തിങ്കളാഴ്ച വാട്ടര്‍ഫോര്‍ഡ് സെന്റ് മേരീസ് പള്ളിയില്‍ സന്ധ്യപ്രാര്‍ത്ഥനയ്ക്ക് ബാവ നേതൃത്വം നല്‍കും. 23-ന് ചൊവ്വാഴ്ച കത്തോലിക്കാ സഭയുടെ വാട്ടര്‍ഫോര്‍ഡ് ബിഷപ്പ് അല്‍ഫോന്‍സാസ് കല്ലിനാനുമായി ബാവ കൂടിക്കാഴ്ച നടത്തും. വൈകിട്ട്
കോര്‍ക്ക് സെന്റ് പീറ്റേഴ്‌സ് യാക്കോബായ സുറിയാനി പള്ളിയിലും ബാവയ്ക്ക് സ്വീകരണം നല്‍കും. ഇവിടെ സന്ധ്യാപ്രാര്‍ത്ഥനയോടെ സന്ദര്‍ശന പരിപാടി സമാപിക്കും. അയര്‍ലണ്ടിന്റെ സ്നേഹവായ്പ്പുകളെല്ലാം ഏറ്റുവാങ്ങി 24-ന് യുകെ സന്ദർശനത്തിനായി ഷാനോൺ എയർപോർട്ടിൽ നിന്നും ലണ്ടനിലേക്ക് ബാവ മടങ്ങും.
അയര്‍ലണ്ടിലെ യാക്കോബായ സുറിയാനി സഭയുടെ വളര്‍ച്ചയില്‍ നാഴികക്കല്ലാവുന്ന ശ്രേഷ്ഠ ബാവായുടെ സന്ദര്‍ശനം ആഘോഷമാക്കാനുള്ള തയാറെടുപ്പിലാണ് അയര്‍ലണ്ടിലെ സഭാ വിശ്വാസികള്‍. കാതോലിക്ക ബാവായുടെ സന്ദര്‍ശനത്തിന് നേതൃത്വം വഹിക്കുന്ന പാത്രിയാർക്കൽ വികാരി അഭിവന്ദ്യ മോര്‍ അലക്‌സന്ത്രയോസ് തോമസ് മെത്രാപ്പോലീത്ത ഇന്നലെ തന്നെ ഡബ്ലിനില്‍ എത്തിയിട്ടുണ്ട്.
അഭിവന്ദ്യ മോര്‍ അലക്‌സന്ത്രയോസ് തോമസ് മെത്രാപ്പോലീത്തയുടെ നേതൃത്വത്തില്‍, ഫാ. ജിനോ ജോസഫ്, ഫാ. ഡോ. ജോബിമോന്‍ സ്‌കറിയ, ഫാ .ബിജോയ് കാരുകുഴിയില്‍, ഫാ. പീറ്റര്‍ വര്‍ഗീസ്, സുനില്‍ എബ്രഹാം, ജിബി ജേക്കബ്, ജെയ്മോന്‍ മാര്‍ക്കോസ്, സന്ദിപ് കല്ലുങ്കല്‍, ബിനു ബി. അന്തിനാട്ട് എന്നിവര്‍ ഉള്‍പ്പെട്ട വിപുലമായ കമ്മിറ്റിയാണ് ശ്രേഷ്ഠ ബാവായുടെ സന്ദര്‍ശനത്തിന് നേതൃത്വം നല്‍കുന്നത്.
