വെട്ടിക്കൽ ● ഉദയഗിരി മലങ്കര സിറിയൻ ഓർത്തഡോക്സ് തിയോളജിക്കൽ സെമിനാരിയിലെ (എം.എസ്.ഒ.റ്റി) ഇക്കോ ക്ലബ്ബിന്റെ ആഭിമുഖ്യത്തിൽ ജൈവ നെൽകൃഷിക്ക് തുടക്കമായി. സെമിനാരിക്ക് സമീപം പാമ്പ്ര പാടശേഖര സമിതിയുടെ നാല് ഏക്കറോളം വരുന്ന പാടശേഖരം പാട്ടത്തിനെടുത്താണ് വൈദിക സെമിനാരി വിദ്യാർത്ഥികൾ ഈ വർഷത്തെ കൃഷി പ്രവർത്തനങ്ങൾ ആരംഭിച്ച് മാതൃകയാകുന്നത്.
ഭാവിയിലെ പുരോഹിതന്മാരായ വിദ്യാർത്ഥികൾക്ക് കൃഷിയുടെ അടിസ്ഥാന പാഠങ്ങൾ പ്രായോഗിക പരിചയത്തിലൂടെ സ്വന്തമാക്കാനും, അവർ ശുശ്രൂഷയ്ക്കായി എത്തുന്ന ഇടങ്ങളിൽ കൃഷിയുടെയും പരിസ്ഥിതി സംരക്ഷണത്തിന്റെയും സന്ദേശം പ്രചരിപ്പിക്കാനും ഇതിലൂടെ പരിശീലനം ലഭിക്കുമെന്ന് കൃഷിക്ക് നേതൃത്വം നൽകുന്ന സെമിനാരി പ്രസിഡന്റ് അഭിവന്ദ്യ ഡോ. മോർ തെയോഫിലോസ് കുര്യാക്കോസ് മെത്രാപ്പോലീത്ത പറഞ്ഞു. സെമിനാരി വിദ്യാഭ്യാസത്തിൽ പഠിക്കുന്ന പരിസ്ഥിതി ദൈവശാസ്ത്രത്തിന്റെയും പാരിസ്ഥിതിക പ്രശ്നങ്ങളുടെയും പ്രായോഗിക
അനുഭവമായി ജൈവ നെൽകൃഷി മാറുന്നുവെന്നും മെത്രാപ്പോലീത്ത കൂട്ടിച്ചേർത്തു.
ദൈവം മനുഷ്യനെ സൃഷ്ടിച്ച് തോട്ടം പരിപാലിക്കാനും അതിൽനിന്ന് ഭക്ഷിക്കാനും നിയോഗിച്ചെങ്കിലും, ഇന്ന് പരിപാലനമില്ലാതെ മനുഷ്യൻ പ്രകൃതിയെ ചൂഷണം ചെയ്യുകയാണ്. ഒരു കാലത്ത് നെൽപ്പാടങ്ങൾ കൊണ്ട് നിറഞ്ഞ കേരളം ഇന്ന് ഊഷര ഭൂമിയായി മാറിക്കൊണ്ടിരിക്കുന്നു. വിഷലിപ്തമായ പച്ചക്കറികൾ 70-80% വരെ നാം ഇതര സംസ്ഥാനങ്ങളിൽ നിന്ന് വാങ്ങി ഭക്ഷിക്കുന്ന അവസ്ഥയാണ് നിലവിലുള്ളത്.
കേരളത്തിൽ തരിശായി കിടക്കുന്ന പാടശേഖരങ്ങളും കാടുപിടിച്ച കൃഷിയിടങ്ങളും ഉപയോഗപ്പെടുത്തി കൃഷിയുടെ സംസ്കാരം വീണ്ടും രൂപപ്പെടുത്തിയില്ലെങ്കിൽ കേരളം രോഗാതുരമായ ഒരു സമൂഹമായി മാറ്റപ്പെടും. സെമിനാരികളിലും വിദ്യാഭ്യാസ സ്ഥാപനങ്ങളിലും ഭാവി തലമുറയ്ക്ക് കൃഷിയെക്കുറിച്ചുള്ള അവബോധം സൃഷ്ടിക്കാനും പ്രചോദനം നൽകാനും ഈ സംരംഭം വഴിയൊരുക്കുമെന്ന് പ്രത്യാശിക്കുന്നതായും മെത്രാപ്പോലീത്ത പറഞ്ഞു.
കഴിഞ്ഞ വർഷം സെമിനാരിയുടെ ആഭിമുഖ്യത്തിൽ തുരുത്തിക്കര പാടത്ത് നടത്തിയ ജൈവ നെൽകൃഷി വിജയകരമായതാണ് ഈ വർഷവും തുടരുവാൻ പ്രചോദനമായതെന്ന് കൃഷി കോർഡിനേറ്ററും ഫാക്കൽറ്റി അംഗവുമായ ഡീക്കൻ ഡോ. അനീഷ് കെ. ജോയി അറിയിച്ചു.
കൃഷിക്ക് തുടക്കം കുറിച്ച ചടങ്ങിൽ പാമ്പ്ര പാടശേഖര സമിതി പ്രസിഡന്റ് കെ.എം തോമസ്, പഞ്ചായത്ത് മെമ്പർ ശോഭ ഏലിയാസ്, മണീട് കാര്‍ഷിക ഓഫീസർ ആൻ വർഗീസ്, അശ്വതി, എം.യു പൗലോസ്, കെ.കെ ജോയ്, കെ.പി ജോർജ് തുടങ്ങിയവർ പങ്കെടുത്തു.
