ദുബായ് ● യാക്കോബായ സുറിയാനി ഓർത്തഡോക്സ് സഭ യു.എ.ഇ മേഖല മഹാസംഗമവും ശ്രേഷ്ഠ കാതോലിക്കായും മലങ്കര മെത്രാപ്പോലീത്തായുമായ ആബൂൻ മോർ ബസ്സേലിയോസ് ജോസഫ് ബാവായ്ക്ക് സ്വീകരണവും നാളെ (നവംബർ 30 ഞായറാഴ്ച) രാവിലെ 10 മണിക്ക് ദുബായ് അൽ നാസർ ലഷർ ലാൻഡിൽ നടക്കും.
‘മരുഭൂമിയിലെ മഞ്ഞിനിക്കര’ എന്നറിയപ്പെടുന്ന ദുബായ് മോർ ഇഗ്നാത്തിയോസ് യാക്കോബായ സുറിയാനി ഓർത്തഡോക്സ് കത്തീഡ്രലിൽ ശ്രേഷ്ഠ കാതോലിക്ക ബാവ നാളെ വിശുദ്ധ കുർബ്ബാന അർപ്പിക്കും. ദുബായ് അൽ നാസർ ലഷർ ലാൻഡിൽ സ്വീകരണത്തെ തുടർന്ന് നടക്കുന്ന പൊതുസമ്മേളനം ലുലു ഗ്രൂപ്പ് ചെയർമാൻ കമാൻഡർ എം.എ യൂസഫ് അലി ഉദ്ഘാടനം ചെയ്യും.
യു.എ.ഇ പാത്രിയാർക്കൽ വികാരി അഭിവന്ദ്യ മോർ യൗസേബിയോസ് കുര്യാക്കോസ് മെത്രാപ്പോലീത്ത അധ്യക്ഷത വഹിക്കും. സോണൽ കൗൺസിൽ ഭാരവാഹികളായ വൈസ് പ്രസിഡന്റ് ഫാ. ബിനു അമ്പാട്ട്, സെക്രട്ടറി സന്ദീപ് ജോർജ്, ട്രഷറർ എൽദോ പി. ജോർജ്, ഫാ. സിബി ബേബി, സഭാ മാനേജിങ് കമ്മിറ്റി അംഗങ്ങളായ സണ്ണി എം. ജോൺ, സരിൻ ചീരൻ, ഫാമിലി കോൺഫറൻസ് കൺവീനർ സ്റ്റേസി സാമുവേൽ, മറ്റ് സോണൽ കൗൺസിൽ അംഗങ്ങൾ എന്നിവർ നേതൃത്വം നൽകും.
രാവിലെ 09:30-ന് രജിസ്ട്രേഷനോടെ ആരംഭിക്കുന്ന പൊതു സമ്മേളനത്തിൽ ശ്രേഷ്ഠ കാതോലിക്ക ബാവ അനുഗ്രഹ പ്രഭാഷണം നടത്തും. സൺ‌ഡേ സ്കൂൾ വിദ്യാർത്ഥികളുടെ മെഗാ ഗായകസംഘ പ്രകടനവും കലാ-സാംസ്കാരിക പരിപാടികളും നടക്കും. യു.എ.ഇ യിലെ വിവിധ ഇടവകകളിൽ നിന്നായി വൈദികരും നൂറു കണക്കിന് വിശ്വാസികളും സംബന്ധിക്കും.
പരിപാടിയുടെ തത്സമയ സംപ്രേക്ഷണം യാക്കോബായ സുറിയാനി ഓർത്തഡോക്സ് സഭയുടെ ഔദ്യോഗിക മാധ്യമ വിഭാഗമായ ജെ.എസ്.സി ന്യൂസിൽ ലഭ്യമാകും
