വാഷിംഗ്ടൺ ● വാഷിംഗ്ടൺ ഡിസിയിലെ ഹിൽട്ടൺ വാഷിംഗ്ടൺ ഡ്യൂലെസ് എയർ പോർട്ട് ഹോട്ടലിൽ വെച്ചു നടത്തുന്ന അമേരിക്കൻ മലങ്കര അതിഭദ്രാസന യൂത്ത് ആന്റ് ഫാമിലി കോൺഫറൻസ് ശ്രദ്ധേയമായി. ചീഫ് ഗസ്റ്റ് ഡോ. സാറാ നൈറ്റ്, അഭിവന്ദ്യ ഡോ. മോർ അന്തിമോസ് മാത്യൂസ് മെത്രാപ്പോലീത്ത, അഭിവന്ദ്യ മോർ ജോസഫ് ബാലി മെത്രാപ്പോലീത്ത, ഫാ. ഏലിജാ എസ്താഫാനോസ് എന്നിവർ മുഖ്യാതിഥികളായിരുന്നു. ഭദ്രാസന കൗൺസിൽ അംഗങ്ങൾ, വന്ദ്യ വൈദീകർ, എൺപതിലധികം പള്ളികളിൽ നിന്നായി അറുനൂറിലധികം വിശ്വാസികളും ചടങ്ങുകളിൽ സംബന്ധിച്ചു.
“വിശ്വസിച്ചാൽ നീ ദൈവത്തിൻ്റെ മഹത്വം കാണും” യോഹന്നാൻ 11: 40 എന്ന ചിന്താ വിഷയത്തെ അടിസ്ഥാനമാക്കി, കുടുംബ സംഗമത്തിൽ പഠന ക്ലാസ്സുകളും ചർച്ചകളും നടന്നു.
ഭദ്രാസന സെക്രട്ടറി ഫാ. ജെറി ജേക്കബ് സ്വാഗതം ആശംസിച്ചു. മൂന്നര പതിറ്റാണ്ടിലധികം പിന്നിട്ട ഭദ്രാസനത്തിന്റെ വളർച്ചയുടെ വിവിധ ഘട്ടങ്ങളെക്കുറിച്ച് ഭദ്രാസനാധിപൻ അഭിവന്ദ്യ മോർ തീത്തോസ് യൽദോ മെത്രാപ്പോലീത്ത ഉദ്ഘാടന പ്രസംഗത്തിൽ വിവരിച്ചു. അമേരിക്കൻ മലങ്കര അതിഭദ്രാസനത്തിന്റെ ഭാഗമായി പ്രവർത്തിക്കുന്ന കാനഡ റീജിയൻ പ്രത്യേക ഭദ്രാസനമായി ഉയർത്തുന്നതിനുള്ള ശുപാർശ പരിശുദ്ധ പാത്രിയർക്കീസ് ബാവായ്ക്ക് സമർപ്പിക്കുമെന്ന് അഭിവന്ദ്യ മെത്രാപ്പോലീത്ത അറിയിച്ചു.
ഫാ. കുര്യാക്കോസ് പുതുപ്പാടി (ലിറിക്സ്), തോമസ് വാരപെട്ടി (മ്യൂസിക്), എൽദോസ് പാലക്കാടൻ (വോക്കൽ), വി.ജെ. പ്രദീഷ് (ഓർക്കസ്ട്രേഷൻ) എന്നിവർ ചേർന്ന് തയ്യാറാക്കിയ ‘നോർത്ത് അമേരിക്കൻ അതിഭദ്രാസന മക്കൾ’ എന്ന ഗാനത്തിന്റെ സമർപ്പണവും നടന്നു. നിഖ്യാ സുന്നഹദോസിന്റെ 1700-ാം വാർഷികാഘോഷത്തിന്റെ ചരിത്ര പ്രാധാന്യത്തെ സംബന്ധിച്ച് ഫാ. പോൾ തോട്ടക്കാട്ട് വിവരിച്ചു.
