പുത്തന്‍കുരിശ് ● യാക്കോബായ സുറിയാനി സഭയുടെ ഭാഗ്യസ്മരണാര്‍ഹനായ ശ്രേഷ്ഠ മോര്‍ ബസ്സേലിയോസ് തോമസ് പ്രഥമന്‍ കാതോലിക്ക ബാവായുടെ 11-ാം ഓര്‍മ്മദിനമായ ഇന്ന് ഞായറാഴ്ച പുത്തന്‍കുരിശ് സെന്റ് അത്തനേഷ്യസ് കത്തീഡ്രലില്‍ രാവിലെ 6.30 ന് ആരംഭിച്ച വിശുദ്ധ കുര്‍ബ്ബാനയ്ക്ക് ജന്മദിന നിറവിലായിരിക്കുന്ന മലങ്കര മെത്രാപ്പോലീത്തായും പരി. എപ്പിസ്‌ക്കോപ്പല്‍ സുന്നഹദോസ് പ്രസിഡന്റുമായ അഭി. ജോസഫ് മോര്‍ ഗ്രീഗോറിയോസ് മെത്രാപ്പോലീത്ത പ്രധാന കാര്‍മികത്വം വഹിച്ചു. അഭി. ഡോ. മാത്യൂസ് മോര്‍ അന്തിമോസ്, വന്ദ്യ ഗബ്രിയേല്‍ റമ്പാന്‍, വന്ദ്യ സ്ലീബാ കാട്ടുമങ്ങാട്ട് കോറെപ്പിസ്‌ക്കോപ്പ എന്നിവര്‍ സഹകാര്‍മികരായി. സഭാ ഭാരവാഹികളും, നിരവധി വൈദീകരും, ആയിരത്തോളം വിശ്വാസികളും വി. കുര്‍ബ്ബാനയിലും കബറിങ്കല്‍ നടത്തപ്പെട്ട ധൂപപ്രാര്‍ത്ഥനയിലും പങ്കെടുത്തു.
തുടര്‍ന്ന് കോതമംഗലം കോണ്‍വെന്റിലെ ബഹു. സിസ്റ്റര്‍മാരുടെ നേതൃത്വത്തില്‍ പ്രാര്‍ത്ഥനാ യോഗം നടന്നു. വൈകീട്ട് സണ്ടേസ്‌കൂള്‍ പ്രസ്ഥാനമായ എം.ജെ.എസ്.എസ്.എ യുടെ ആഭിമുഖ്യത്തില്‍ അനുസ്മരണ യോഗം നടത്തപ്പെട്ടു.
വൈകീട്ട് 6.00 മണിയ്ക്ക് നടന്ന സന്ധ്യാപ്രാര്‍ത്ഥനയില്‍ അഭി. മാത്യൂസ് മോര്‍ ഈവാനിയോസ്, അഭി. ഐസക് മോര്‍ ഒസ്താത്തിയോസ്, അഭി. ഡോ. മാത്യൂസ് മോര്‍ അന്തിമോസ് എന്നീ മെത്രാപ്പോലീത്തമാരും, വന്ദ്യ കോറെപ്പിസ്‌ക്കോപ്പാമാരും, വന്ദ്യ റമ്പാച്ചനും, ബഹു. വൈദീകരും, നിരവധി വിശ്വാസികളും സംബന്ധിച്ചു.
