പുത്തൻകുരിശ് ● യാക്കോബായ സുറിയാനി സഭയുടെ ഭാഗ്യസ്മരണാര്‍ഹനായ ശ്രേഷ്ഠ മോര്‍ ബസ്സേലിയോസ് തോമസ് പ്രഥമന്‍ കാതോലിക്ക ബാവായുടെ 15-ാം ഓര്‍മ്മദിനമായ ഇന്ന് വ്യാഴാഴ്ച പുത്തന്‍കുരിശ്  സെന്റ് അത്തനേഷ്യസ് കത്തീഡ്രലില്‍ രാവിലെ 6.30 ന്  ആരംഭിച്ച വിശുദ്ധ കുര്‍ബ്ബാനയ്ക്ക്  അഭിവന്ദ്യ മാത്യൂസ് മോര്‍ തേവോദോസിയോസ് മെത്രാപ്പോലീത്ത പ്രധാന കാര്‍മികത്വവും, വന്ദ്യ ഗീവര്‍ഗ്ഗീസ് കോറെപ്പിസ്‌ക്കോപ്പ, ഫാ. സാബു സാമുവേല്‍,  ഫാ. ജോര്‍ജ്ജ് പെരുമ്പട്ടത്ത് എന്നിവര്‍ സഹകാര്‍മികത്വവും വഹിച്ചു.  സഭാ ഭാരവാഹികളും, നിരവധി വൈദീകരും, അനേകം വിശ്വാസികളും വി. കുര്‍ബ്ബാനയിലും,  കബറിങ്കല്‍ നടത്തപ്പെട്ട ധൂപപ്രാര്‍ത്ഥനയിലും പങ്കെടുത്തു. 

സി.എം.പി. സംസ്ഥാന ജനറല്‍ സെക്രട്ടറി ശ്രീ. സി.പി. ജോണ്‍ ശ്രേഷ്ഠ ബാവായുടെ കബറിങ്കല്‍ എത്തി അനുശോചനം അറിയിച്ചു. തുടര്‍ന്ന്  9.30 മണി മുതല്‍ വൈകീട്ട്  5.30 വരെ പരി. സഭയുടെ കീഴിലുള്ള  ജെ.എസ്.സി. മിഷന്റെയും കൊല്ലം, തുമ്പമണ്‍ ഭദ്രാസനത്തിന്റെയും ആഭിമുഖ്യത്തില പ്രാര്‍ത്ഥനാ യോഗം നടന്നു. പുത്തന്‍കുരിശ് ബി.ടി.സി പബ്‌ളിക് സ്‌കൂളിലെ അദ്ധ്യാപകരും, വിദ്യാര്‍ത്ഥികളും ശ്രേഷ്ഠ ബാവായുടെ കബറിങ്കല്‍ വന്ന് പ്രാര്‍ത്ഥന നടത്തി. ഉച്ചയക്ക് 12.00 മണിയ്ക്ക് ഉച്ചനമസ്‌ക്കാരം നടന്നു.

ബിലീവേഴ്‌സ് ചര്‍ച്ചിന്റെ അധിപന്‍ മോര്‍ സാമുവേല്‍ തെയോഫിലോസ് മെത്രാപ്പോലീത്ത, ബിഷപ്പ് മാത്യൂസ് മോര്‍ സില്‍വാനോസ്, സെക്രട്ടറി ഫാ. സഞ്ജീവ് ബഞ്ചമിന്‍ തുടങ്ങി നിരവധി വൈദീകരും ശ്രേഷ്ഠ ബാവായുടെ കബറിങ്കല്‍ എത്തി ധൂപ പ്രാര്‍ത്ഥന നടത്തി പ്രണാമം അര്‍പ്പിച്ചു. 

വൈകീട്ട് 6.00 മണിയ്ക്ക് നടന്ന സന്ധ്യാപ്രാര്‍ത്ഥനയ്ക്ക് മലങ്കര മെത്രാപ്പോലീത്തായും പരി. എപ്പിസ്‌ക്കോപ്പല്‍ സുന്നഹദോസ് പ്രസിഡന്റുമായ അഭി. ജോസഫ് മോര്‍ ഗ്രീഗോറിയോസ് മെത്രാപ്പോലീത്ത നേതൃത്വം നല്‍കി. അഭി. മാത്യൂസ് മോര്‍ ഈവാനിയോസ്, അഭി. ഡോ. മാത്യൂസ് മോര്‍ അന്തിമോസ് എന്നീ മെത്രാപ്പോലീത്താമാരും, വന്ദ്യ കോറെപ്പിസ്‌ക്കോപ്പാമാരും, ബഹു. വൈദീകരും, നിരവധി വിശ്വാസികളും സംബന്ധിച്ചു.